د تخار ولایت هزارسموچ ولسوالۍ کې له خلکو سره ناسته وشوه
پنجشنبه ۱۶/شعبان المعظم/ ۱۴۴۴
د سرحدونو، قومونو او قبایلو چارو وزارت اړوند د تخار ولایت د سرحدونو، قومونو او قبایلو چارو امریت له لورې د یاد ولایت په هزار سموچ ولسوالۍ کې له قومونو سره د یووالي او همغږۍ غونډه ترسره شوه.
په دغه غونډه کې د تخار ولایت د سرحدونو، قومونو او قبایلو چارو آمر، مل پلاوي، د یادې ولسوالۍ محترم ولسوال مولوي محمد حسین عبید، د قومي شوراوو مشرانو او علماء کرامو ګډون کړی وو. په پیل کې ولسوال ښاغلي عبید ګډونوالو ته وینا وکړه او د یاد ریاست پلاوي ته یې د هرکلي ترڅنک وویل: د دې ولسوالۍ ټول قومونه د ا.ا.ا ملاتړي او یووالي ته ژمن دي.
ورپسې د یادې ولسوالۍ څخه څو تنو مشرانو او علماوو خبرې وکړې او د نظام ملاتړ یې خپله دنده وبلله هغوی زیاته کړه: موږ په تېر وخت کې هم قربانۍ ورکړې او اوس مو هم په یووالي د نظام ترشا ولاړ یو. هغوی له حکومت څخه د څړځایونو پر سر د اختلاف د حل او د سرکونو د جوړېدلو غوښتنه وکړه.
په اخیر کې د یاد ریاست آمر د غونډې ګډون وال وحدت او همغږي ته را وبلل او زیاته یې کړه: دا زموږ مسؤلیت دی چې ستاسي ستونزې واورو او د حل کولو په موخه یې تر اړوندو ارګانونو ور ورسوو.
