د تخار په ولايت کې د قومونو د همغږۍ جرګه ترسره شوه
د افغانستان يوه لويشت خاوره د سر په قيمت هم ارزانه ده (نوري)
۱۴۴۴/۱/۲۴ دوشنبه
د سرحدونو قومونو او قبایلو چارو وزارت سرپرست وزير الحاج ملا نورالله نوري او ورسره مل پلاوي تخار ولايت ته د سفر په ترڅ کې ددې ولايت د قومونو تر منځ د همغږۍ په نوم ستره ولسي غونډه تر سره کړه. په دې غونډه کې چې د مرکز په شمول د تخار له ټولو ولسواليو څخه راغلو سلګونه قومي مخورو او علماء کرامو پکې ګډون کړی و د يووالي، اتحاد او اسلامي نظام څخه د ملاتړ اړوند ويناوې تر سره شوې. د ځايي اوسيدونکو په نمايندګي مخدوم حيات الله او مولوي سبحان الله فرقاني غونډې ته په وينا کې د اسلامي امارت نظام د افغانانو نظام وباله، سوله او اسلامي شرعي نظام يې د تېر ۴۴ کاله مبارزې او جهاد ثمره ياده کړه او زياته يې کړه چي پر افغانانو ددې ستر نعمت د شکر اداينه واجب ده. د تخار ولسونو له اسلامي امارت څخه وغوښتل چې د تخار سرحدي ولسواليو ته ځانګړې پاملرنه وشي او د آمو سيند د تخريباتو د مخنيوي لپاره دي جدي هلي ځلې وکړي. غونډې ته د جرګو او قبایلي چارو د همغږۍ رئيس مولوي محمد اسماعيل غزنوي وويل: امريکايانو او بهرنيو استخباراتو شل کاله زموږ د واحد ملت د بيلولو او ويشلو هڅې وکړې خو د اسلامي امارت بريا د دښمن ټول شوم پلانونه شنډ کړل او موږ يو ځل بيا د يوه متحد ملت په توګه د امن ژوند پيل کړ. په پاي کې د سرحدونو قومونو او قبایلو چارو سرپرست وزير ملا نورالله نوري غونډې ته وينا وکړه. ښاغلي نوري وويل: د سرحدونو څار او ساتنه زموږ لومړيتوب، دنده او وجيبه ده، په شل کاله جهاد کې زموږ يو ستر هدف د خپلې خاورې څخه دفاع او خپلواکۍ ګټل وو، چي دې هدف ته رسيدلي يو، د هيواد لويشت خاوره د سر په بيه بيا هم وړيا ده. د نظام ساتنه او د ولسونو تر منځ اتحاد او همغږي رامنځته کول د ښې راتلونکې ضامن دی. ښاغلي نوري د افغانستان داخلي جنګونو ته په اشارې سره وويل: موږ وليدل چي زموږ ملت د وحدت ملي، اتحاد اسلامي او په داسي نورو نومونو د وحدت پر ځای پخپلو کې ويشلي وو خو دا چي د اسلامي امارت يو صف، يو دريځ يو امير او يوه تګلاره وه چي افغانستان ته يې يو ځل بيا له حتمي تجزيې او د قدرت له جزيرو څخه نجات ورکړ. غونډه د اسلامي نظام د بقا او ولسونو د اتحاد او يووالي په دعا پاي ته ورسيده
