د اداري او تدارکاتي چارو پر چټکتیا ټینګار وشو!
د سرحدونو او قبایلو چارو وزارت مسلکي معین ښاغلي محمد آصف ننګ نن سه شنبه د روان لمریز کال د چنګاښ میاشتې پر ۸ مه نېټه د وزارت له یو شمېر رئيسانو سره د خپل کار په دفتر کې وکتل او د اداري او تدارکاتي چارو پر چټکتیا یې ټینګار وکړ.
په یاده کتنه کې اړوندو رئیسانو د عادي او پرمختیایې بودجې د لګښت د سلنې لوړولو، پر وخت سره د تدارکاتي چارو د پرمخ بیولو، د بیوکراسۍ د له منځه وړلو او په دې برخو کې د شته ستونزو په اړه خپل معلومات شریک کړل.
ورپسې ښاغلي محمد آصف ننګ پر وخت سره د تدارکاتي چارو په ترسره کولو باندې په ټینګار سره وویل: دا، چې د مالي کال اوومه میاشت پیل شوې نو باید موږ په خپلو اداري چارو کې چټکتیا رامنځته کړو، ترڅو د وزارت د عادي او پرمختیایې بودجې د لګښت سلنه لوړه شي.
همدا راز د ښوونې او روزنې، اطلاعاتو او عامه اړیکو، پلان او پالیسۍ او د تحقیق او مطالعاتو رئیسانو ته لارښوونه وشوه، چې سبا د اطلاعاتو او فرهنګ په وزارت کې د یادو وزارت له مشرتابه سره د پښتونخوا د لیکوالانو د کتابونو د چاپ او د فرهنګي مرکزونو د جوړولو په اړه وګوري او له هغو سره له سلا مشورو وروسته خپل نظریات د وزارت له مشرتابه سره شریک کړي
