د سرحدونو او قبایلو چارو وزارت رهبري سره د جمهوررئیس ناسته
جمهوررئیس محمد اشرف غني نن مازدیګر د سرحدونو او قبایلو چارو وزارت رهبري پلاوي سره په ناسته کې، د دغه وزارت د کړنو او فعالیتونو راپور واورېد.
په دغه ناسته کې چې په ارګ کې وشوه، په پیل کې د سرحدونو او قبایلو چارو وزیر د یاد وزارت د چارو او فعالیتونو راپور وړاندې کولو پر مهال په بېلابېلو برخو کې خپل وړاندیزونه له جمهوررئیس سره شریک کړل.
جمهوررئیس غني د یاد راپور له اورېدو وروسته وویل، همغږي، انسجام، په ولایتونو کې د قومي شوراګانو او د خلکو ترمنځ د اړیکو پیاوړتیا او د ملي یووالي تحکیم له مهمو مسایلو څخه دي چې باید پاملرنه ورته وشي.
جمهوررئیس د سرحدونو او قبایلو چارو وزارت رهبري پلاوي ته لارښوونه وکړه چې د دغه وزارت اړوندو ښوونځیو زدکوونکو د بدل اعاشې زیاتوالي او دوی ته د تحصیلي بورسیو د ورکړې برخې ته لازمه پاملرنه وکړي.
ARG - ارگ
