په خوست کې د منګلو قوم له يو شمېر مشرانو او ځوانانو سره کتنه!
د سرحدونو او قبایلو چارو وزیر ښاغلي محب الله صمیم نن له غرمې وروسته خوست ته د خپل سفر په ترڅ کې په دغه ولايت کې د منګلو قوم له مشرانو او ځوانانو سره وکتل.
په دې کتنه کې يادو مشرانو او ځوانانو ښاغلي محب الله صميم ته د ښه راغلاست ویلو ترڅنګ د قومونو د انسجام او ملي یووالي په ټینګښت د سرحدونو او قبایلو چارو وزارت د مشرتابه هلې ځلې وستایلې، نوموړو دغه راز د نظام د ملاتړ ترڅنګ په بېلابېلو برخو کې خپلې یو لړ ستونزې د وزارت له مشرتابه سره شریکې کړې او د حل غوښتنه یې وکړه.
ورپسې ښاغلي محب الله صمیم د دوې له مېلمه پالنې څخه د مننې په ترڅ کې له نظام او جمهوريت څخه د دوې ملاتړ وستایه وی وویل: موږ بايد په ګډه کار وکړو ترڅو هېواد مو له جګړو او ناخوالو وژغورل شي .زما د سفر موخه تاسو سره له نږدې ليدل او ستاسو د ستونزو اورېدل دي مونږ په خپل ټول توان سره ستاسو په خدمت کې یو.
ښاغلي صمیم دغه راز د مشرانو او ځوانانو ستونزې پر ځای وبللې زیاته یې کړه: تاسو ته ډاډ درکوم، چې ستونزې به مو له اړوندو ادارو سره د حل په موخه شریکې کړم.
