د هلمند ولایت د خلکو عالي شورا له مشرتابه سره ناسته!
د سرحدونو او قبایلو چارو وزیر ښاغلی محب الله صمیم نن مازدیګر د هلمند ولایت د خلکو عالي شورا له مشرتابه ښاغلي عبیدالله زیارمل او د یاد ولایت د ولسونو حقوقو اجرائیوي بورد له مشر ښاغلي حاجي علاوالدین بادیزي سره د خپل کار په دفتر کې وکتل.
په دې کتنه کې راغلو مشرانو د شورا د کړنو او فعالیتونو په اړه لنډ معلومات وړاندې کړل او د هلمند ولایت د قومي مشرانو او مخورو ستونزو شریکولو ترڅنګ یې د وزارت له مشرتابه څخه وغوښتل چې د تل په څېر د وزارت په غونډو او جرګو کې دوی ته ونډه ورکړل شي.
ورپسې ښاغلي محب الله صمیم خبرې وکړې او د راغلو مشرانو ستونزې یې پر ځای وبللې وې ویل: هلمند د هېواد یو مهم او لوی ولایت دی، چې خلکو یې تل د نظام د پایښت او د هېواد په آبادې کې هلې کړي دي هیله مو داده، چې تاسو قومي مشران د تلپاتې اوربند او باعزته سولې د ټینګښت په برخه کې خپل غږ اوچت کړئ او ولسونه ملي یووالي ته راوبولئ.
