د قبایلي مشرانو او ځوانانو ستونزې واورېدل شوې!
د سرحدونو او قبایلو چارو وزیر ښاغلي محب الله صمیم نن له غرمې مخکې د قبایلو له یو شمېر مشرانو او ځوانانو سره د خپل کار په دفتر کې وکتل.
په دې کتنه کې راغلو مشرانو د پېژند پاڼو، ویزو د آسانتیاوو او د زده کړو په برخه کې خپلې یو لړ ستونزې د حل په موخه د وزارت له مشرتابه سره شریکې کړې او د فرهنګي اړیکو د پیاوړتیا، امن، او یووالي په موخه یې په سلامشورو ټینګار وکړ.
ورپسې د سرحدونو او قبایلو چارو وزیر ښاغلي محب الله صمیم پخپلو خبرو کې د یادو مشرانو ستونزې پر ځای وبللې وې ویل: هڅه به مو دا وي، چې ستاسو ستونزې له اړوندو ادارو سره شریکې کړو او تاسو قبایلي مشرانو او ځوانانو ته د پېژند پاڼو او ویزو په ورکړه کې آسانتیاوې رامنځته کړو.
