کنړ کې ۱۲ کلنې او سمنګان ولایت کې ۱۱ کلنې شخړې پای وموند
یکشنبه، ۷ ربیعالأول ۱۴۴۷
د کنړ ولایت د سرحدونو، قومونو او قبایلو چارو ریاست مسؤلینو په هڅو او د سیمه ییزو مشرانو، علماوو او متنفذینو په همکارۍ د یاد ولایت په ناړۍ ولسوالۍ کې شاوخوا دوولس کلنې اوږدمهالې شخړې ته د پای ټکی کېښود او دواړو لوریو د خوښۍ غاړې ورکړې.
په دغه رامنځته شوې خونړۍ شخړه کې شپږ تنه وژل شوي وو، څو تنه ټپیان شوي وو، او کلونه کلونه کینې، بې باورۍ او خفګانونه یې تر منځ موجود وو، چې مسؤلینو د خیر په فیصله کولو سره د ورورولۍ فضا رامنځته کړه.
همدارنګه د سمنګان ولایت د سرحدونو، قومونو او قبیلو چارو آمرېت لخوا هم په دغه ولایت کې د دوو کورنیو ترمنځ شاوخوا یوولس کلنه دوامداره شخړه پای ته ورسېده. د یادې شخړې له کبله دواړو خواوو ته ژورې اندېښنې موجودې وې.
