((څوک چې د دې خاورې د بیا اخلالولو سوچونه وهي، زموږ شل کلنې قربانۍ او مبارزې دي وریادې کړي))
سه شنبه /۴/ذوالقعده/۱۴۴۷
د سرحدونو، قومونو او قبایلو چارو وزیر ملا نورالله نوري په بغلان کې له اسلامي نظام څخه د دفاع غونډې ته وویل؛ له فتحې وروسته د امیرالمؤمنین حفظه الله تعالی د عفوې فرمان د کورنۍ جګړې د مخنیوي یو تاریخي ګام و. هغه افغانان مېړني خلک وبلل، زیاته یې کړه، څو چې دا ځوانان ژوندي وي څوک به افغانستان ته چپ و نه ګوري. نوموړي دغه راز څرګنده کړه، هغوی چې د دې خاورې د بیا اخلالولو سوچونه وهي، زموږ شل کلنې قربانۍ او مبارزې دي وریادې کړي.
په غونډه کې د جرګو او قبایلو چارو د همغږۍ معین مولوي محمد علي جان احمد افغانان په جنګونو کې لوبېدلي خلک یاد کړل ویې ويل، افغانان هغه خلک دي چې د چا تهدید او زور ته غاړه نه ږدي. هغه زیاته کړه: کومو خلکو چې پرون یې د وطن دوستۍ او پرمختګ وعدې ورکولې نن یې د ګډوډۍ لپاره د افغانستان له دښمنانو سره لاس یو کړی.
قومي مخورو په خپل وار د نظام ننګه خپل مسؤلیت وباله زیاته یې کړه، چې هغوی به چاته اجازه ور نه کړي چې څوک د اسلامي امارت په وړاندې خنډونه ایجاد کړي. مخورو مشرانو خلک د قوم، تنظیم او سمت پرستي مخنیوي ته را وبلل، ویې ویل: د دې ملت بریا او د اسلامي نظام پایښت په اطاعت او اتحاد کې نغښتې ده.
په دغه ناسته کې د امربالمعروف معین شیخ نورمحمد حقاني، د استخبارتو ریاست استازی مولوي اختر شاه هاشمي، د بغلان والي مولوي عبدالرحمن حقاني، د یاد ولایت قومي مخورو، علماء کرامو، د ولسوالۍ استازو، د پوهنتون استادانو او عامو خلکو ګډون کړی وو.
