په کونړ کې د سولې په خبرو کې د ځوانانو فعالې ونډې تر سر ليک لاندې غونډه.
د روان ۱۳۹۸ لمریز کال د کب میاشتې پر(۴ مه) نېټه د سولې په روانو خبرو اترو کې د ځوانانو فعالې ونډې او په تېرو دوه لسيزو لاسته راړنو د ساتنې او لا پرمختګ په موخه، سولې لپاره د ځوانانو اړيکو ګروپ په نوښت او د سرحدونو او قبايلو چارو رياست په همکارۍ د دې رياست د جرګو په تالار کې غونډه جوړه شوه، چې په مراسمو کې يې د سرحدونو او قبايلو چارو رييس استاد فريدالله(حسام)، له مرکز(کابل) څخه راغلي پلاوي، قومي مشرانو، علماء کرامو، ګڼو کونړ مېشتو ځوانانو، مدني فعالانو او خويندو برخه لرله چې د ګډونوالو شمېر يې نږدې(۲۵۰) تنو ته رسېده.
مراسم د قرانکریم څو مبارکو اياتونو پر تلاوت پیل او ترې وروسته ملي سرود خپور شو.
ورپسې د سولې لپاره د ځوانانو اړيکو ګروپ د دارالنشاء آمر سنګر(اميرزاده) وينا وکړه د جرګې ګډونوالو ته يې د ښه راغلاست ترڅنګ، د سولې او امن په ټينګښت کې د ځوانانو پر ارزښتمن رول خپلې خبرې وکړې زياته يې کړه، چې ځوانانو ته پر ارزښت ورکولو سره د تلپاتې سولې او امن ټينګښت شونی دی، ځکه د ټولنې ټول قشرونه او په ځانګړې توګه ځوانان تر بل هر وخت لوستي او ځيرک دي او خپلې خبرې يې د سرحدونو او قبايلو چارو له مشرتابه او کونړ مېشتو ځوانو څخه په مننې پای ته ورسولې.
ورپسې سياسي فعال راحت الله(ساپي)، مولوي ضياء الرحمن(الله يار)، ځوان کدر حشمت الله(ژمن)، افغان ځوانانو د ټولنې مشر غورځنګ(سيال)، مدني فعال شعيب(غروال)، قومي مشر زمرک(عابد) او څارنوال ذاهدالله(سرتور) يو پر بل پسې په خپلو خبرو کې د سولې ټينګښت تر څنګ د سولې د پايښت او تضمين غوښتنه هم وکړه، دوې همداراز وويل: چې د سولې خبرو اترو کې دې افغان ځوانانو ته فعاله ونډه ور کړي.
وروسته په کونړ کې د سولې لپاره د ځوانانو اړيکو ګروپ استازي ساجدالله(افغانمل) د غونډې پرېکړه ليک ولوست چې په کې د سولې په تړاو د دايمي اوربند غوښتنه شوې وه.
جرګه په هېواد کې د تلپاتې او باعزته سولې د ټینګښت په دُعا سره پای ته ورسېده.
