په کندهار ولایت کې یوه لویه قومي غونډه جوړه شوه
۱۰ / رجب المرجب/ ۱۴۴۴هـ ق
د سرحدونو، قومونو او قبایلو چارو وزارت له لوري په کندهار ولایت کې د قومونو د یووالي، د خلکو د ستونزو اوریدلو او د نظام نه د ملاتړ یوه لویه ولسي او قومي غونډه جوړه شوه. په دغه غونډه کې د یاد وزارت د سرپرست الحاج ملا نورالله نوري په شمول د یاد وزارت د جرګو او قبایلي چارو د همغږۍ معین ملا عبدالخالق عابد، مل پلاوي، د یاد ولایت مرستيال والي د ادارو رئیسانو، علماوو او قومي مشرانو ګډون کړی و.
د ولسواليو او مرکز د خلکو په نمايندګي څو تنو مشرانو خبرې وکړې. ورپسې د سرحدونو، قومونو او قبایلو چارو وزارت سرپرست وزیر غونډې ته د وینا کولو په وخت کې یاد ولایت د ټولو اتلانو کور یاد کړ، او زیاته یې کړه چې د امريکايي کرغېړن اشغال په اوږدو کې نه يوازې دا چې اسلامي نظام او خپلواکي له منځه تللې وه، بلکې د اسلامي او افغاني ارزښتونو تحريف، غلا، غصب، فساد او فکري انحراف خپل اوج ته رسېدلی او غربي فرهنګ رايج شوی وو، چې د اسلامي امارت په بريا سره ددې ټولو ناخوالو مخه ونيول شوه. د جرګو او قبايلي چارو د همغږۍ معين الحاج ملا عبدالخالق عابد غونډې ته په خپلو خبرو کې وویل: الله تعالی بشریت په قومونو ویشلی د دې لپاره چې دوی یو بل سره وپیژني او په دوی کې بهتر هغه دی چې له خدای جل جلاله څخه ډیر ویریږي او تقوا کوي. غونډه د هيواد او ولس د خير په دعا سره پای ته ورسېده.
