په هيواد کې د ولسواليو په کچه د مسؤلينو او ولسي خلکو ترمنځ د اسلامي اخوت او خلکو ستونزو ته د رسېدو په موخه غونډې ترسره شوې
پنجشنبه ۲۹ جمادی الأولی ۱۴۴۷
د سرحدونو، قومونو او قبایلو چارو وزارت له لوري د خپلو اړونده رياستونو په مرسته داځل د تخار ولايت په اشکمش ولسوالي، د سمنګان ولايت په روی دوآب ولسوالي، د غزني ولايت په ناهور ولسوالي، د کنړ ولايت يه غازي آباد او ناړۍ ولسوالۍ او د دايکندي ولايت په شهرستان ولسوالي کې د ولسي ستونزو د اورېدو په موخه ولسي غوندې ترسره شوې، چې پر مهال یې د ولسواليو استازو په ګډون، قومي مشرانو، ديني عالمانو، سپین ږیرو او ځوانانو برخه لرله.
قومي مشرانو د غونډې پر مهال ټينګار وکړ، چې د ولسونو ترمنځ دې د همدې ډول غونډو له لارې د دښمنيو او بي اتفاقيو جرړې ختمې شي، ځکه دا د ملت د يووالي او همغږۍ پر وړاندې خنډونه جوړوي. دوی همداراز زياته کړه، چې ولسواليو ته د ا.ا.ا د مشرانو پام زيات شوی او هڅې روانې دي تر څو د ولس ستونزې حل او اړينو خدمتونو ته د خلکو لاسرسی لا ښه شي. قومي مشرانو همداراز د خپلو سيمه ييزو ستونزو د يادونې ترڅنګ د اسلامي امارت پر کلک ملاتړ هم ټينګار وکړ.
د دغو جوړو شويو غونډو پرمهال مسؤلينو د ولسي ملاتړ څخه په مننې کولو سره وويل: ولسونو هروخت د دې نظام د حاکميت لپاره د خپل ايمان او ميړانې له کبله ډيرې سترې قربانۍ ورکړي دي. دوی همداراز خلکو ته ډاډ ورکړ، چې په وينا يې د اسلامي امارت مشران شپه او ورځ ستاسو د خدمت او ملاتړ لپاره چمتو دي. يادو مسؤلينو د ولسواليو په کچه د خلکو ستونزو ته رسېدنه خپله دنده ياده کړه او ژمنه يې وکړه، چې د ممکنه لارو چارو به يې د حل کولو هڅې وکړي.
