په نيمروز ولايت کې له ولسي خلکو سره لويه ولسي غونډه وشوه
چهارشنبه ۱۴۴۶/۶/۲۳
د سرحدونو، قومونو او قبايلو چارو د جرګو او قبايلي چارو د همغږۍ مرستيال الحاج مولوي محمد علي جان احمد له مل پلاوي سره نن د نيمروز ولايت په مرکز زرنج ښار کې د اسلامي نظام ثبات، د ولسونو د يووالي او انسجام لويه ولسي غونډه جوړه کړه، چې پکې د ياد ولایت والي الحاج مولوي محمد قاسم خالد، د بېلا بېلو ولسواليو استازو، دیني عالمانو او قومي سپين ږيرو ونډه لرله.
قومي مشرانو د تېر شل کلن اشغال پر مهال له مجاهدينو سره د خپلو مرستو او قربانيو يادونه وکړه او ويې ويل: زموږ کورونه د مجاهدينو سنګرونه وو په مال، ځان او بچيانو مو قربانۍ ورکړې او که اړتيا شوه بيا هم تيار يو. قومي مشرانو زياته کړه: د دولت او ملت تر منځ پوره هماهنګي ده، نن موږ د اسلامي امارت له لوړ رتبه مسؤلینو سره په ډاډه زړه خپلې ستونزې شریکوو او دا یو مثبت بدلون دی، چې په تېرو شلو کلونو کې یې موږ نمونه نه وه لیدلې.
د جرګو او قبايلي چارو د همغږۍ مرستيال الحاج مولوي محمد علي جان احمد په خپلو خبرو کې وويل: د تېرو جهادونو، قربانيو او اسلامي نظام قائمېدو هدف مو د شريعت پلي کول وو تر څو ټول ولسونه د اسلامي نظام تر سیوري لاندې ژوند تېر کړي. نوموړي همدا راز خلک اتفاق او اتحاد ته را وبلل او د اسلامي امارت بريا يې د شل کلنې مبارزې، قربانيو، اتفاق، اتحاد او يو والي نتيجه ياده کړه.
همداراز د نیمروز والي الحاج محمد قاسم خالد د غونډې خلکو ته وویل: په نیمروز ولایت کې امنیت تأمین دی، دا ځکه چې د نیمروز ولایت ولس له حکومت سره په دې برخه کې پوره همکار دي، نوموړي زیاته کړه دا نیمروز ولایت د ولس ستونزو ته شپه او ورځ ولاړ یو څومره مو چې وس کېږي د حل کولو هڅه یې کوو.
په پاي کې د کوچیانو د څړځايونو اقتصادي چارو رئیس مفتي لعل محمد منيب ګډونوالو ته وويل: هېڅ افغان نه غواړي، چې افغانستان په جګړه کې ښکېل شي، اسلامي امارت ورځ تربلې پرمختګ کوي او ژر ده، چې د نظامي جګړې په څېر به اقتصادي جګړه کې هم کاميابي ترلاسه کړي.
