په ننګرهار ولایت کې ۶۰ کلنه دوښمني په دوستي بدله شوه
۲۵/۱۰/۱۴۴۵
د ننګرهار په دره نور ولسوالۍ کې د کُنړ ولایت د نورګل ولسوالۍ د دوو مېشتو کورنیو تر منځ ۶۰ کلنه دښمني چې له کبله یې ۵ کسان هم وژل شوي وو، د یاد ولایت د سرحدونو، قومونو او قبایلو چارو ریاست مسؤلینو او د دره نور ولسوالۍ د قومي مشرانو په برکت په دوستي بدله شوه. د دغې دښمنۍ د حل په موخه د شخړې دواړه لوري، قومي سپین ږیري او د ریاست مسؤلین په یوه مرکه کې راټول شوي وو چې، پر مهال یې مرکچي پلاوي ته اختیار ورکړل شو او له پوره څېړنې وروسته د موضوع په اړه پرېکړه ونیول شوه. په پرېکړه کې یوه لوري ته له افغاني دود سره سم د مرکچیانو عذر وړاندې شو، چې له منلو سره سم یې دواړو لوریو یو بل ته د پخلاینې غېږه ورکړه. د یادونې ده، چې د سرحدونو، قومونو او قبایلو چارو وزارت دا او دې ته ورته لویي او وړې شخړې د هیواد په ټولو ولایتونو کې د سیمه ییزو مشرانو او قومي مخورو په همکارۍ حل کړې دي او په دې برخه کې لا هم ګړندي ګامونه اخلي.
