په شینکۍ ولسوالي کې له قومي مخورو سره د هغمږۍ غونډه وشوه
۱/ ذالقعدة الحرام/ ۱۴۴۴
د سرحدونو، قومونو او قبایلو چارو سرپرست الحاج ملا نورالله نوري د زابل ولایت شینکۍ ولسوالۍ ته د خپل رسمي سفر په ترڅ کې د شینکۍ، اټغر او سیوري ولسوالیو له قومي مشرانو سره وکتل. د دغې کتنې پر مهال د یاد وزارت سرپرست ښاغلی نوري، د زابل مرستیال والي محب الله حماس، مولوي عبدالقدوس د زابل د علماء د شورا غړی، د یاد ولایت د سرحدونو قومونو او قبایلو چارو رئیس عبدالکریم سحر، د شینکۍ ولسوالي امنیه قومندان نعمت الله شکیب، د شینکۍ ولسوال زبیر آغا، قومي سپین ږیرو او عالمانو حضور درلود. د لیدنې په پیل کې د قومي سپین ږیرو په استازیتوب څو تنو خبرې وکړې د تېر اشغال ماته او د اسلامي نظام قائمېدل یې د قومونو د قربانیو او یووالي برکت وباله، دوی وویل:
موږ د دې نظام تر څنګ ولاړ یو او په ټینګښت کې یې له هیڅ ډول همکارۍ څخه درېغ نه کوو او هر ډول قربانۍ ته تیار یو. دوی د هیواد امنیت، او یووالی بې ساري یاد کړل او له حکومت څخه یې د څلورو ولسوالیو د سړک رغول او د لوی پل د جوړېدو غوښتنه وکړه او داسې نور. د ناستې په وروستیو کې د ښاغلي نوري د خپل سفر هدف د یادو ولسونو پوښتنه او د دوی ستونزې اورېدل یاد کړ او ویې ویل: تاریخ مه هېروئ، افغانان په هر انقلاب کې اتلان لري، دا یو ډېر لوی تاریخ دی چې د شینکۍ سیوري او اټغر خلکو لوی ملا صاحب رحمه الله ته په خپله غېږه کې ځای ورکړی و. هغه د اسلامي نظام ارزښت ته په اشارې سره وویل: د نظام په راتګ سره سمت پرستي قومپرستي او تعصب له منځه تللي او د افغانانو عفت، عزت او وقار خوندي دی. هغه همدا راز زیاته کړه: لکه څرنګه مو چې پرون جهاد یوه فریضه وه اوس مو د دې ولس ساتل، د دوی ستونزو حل کول، دوی ته خدمت کول یوه فریضه ګڼلې ده، ښاغلي نوري د خلکو د ستونزو په اړه وویل: ستاسې ټولې ستونزې به موږ د حل په موخه تر لوړو مقاماتو رسوو.
