په شاجوی ولسوالي کې له خلکو سره یوه لویه غونډه ترسره شوه
چهارشنبه/صفرالمظفر/۱۴/۱۴۴۸
د سرحدونو، قومونو او قبایلو چارو وزیر ملا نورالله نوري د زابل ولایت شاجوی ولسوالۍ له قومي مخورو، دیني عالمانو او سیمه ییزو متنفذینو په ګډون یوه لویه ولسي غونډه جوړه کړه، چې پر مهال یې د یادې ولسوالۍ د علماء شورا رئیس، امنیه قومندان او نورو محلي مسؤلینو حضور درلود.
د غونډې پرمهال علماء کرامو او سپین ږیرو په خپلو څرګندونو کې وویل: لله الحمد اسلامي امارت د هیواد په ټوله جغرافیه سلطه لري او د دې لپاره یو ښه فرصت دی چې خلک په جامعه کې د منکراتو په مخنیوي کې خپلې هڅې نورې هم ګړندۍ کړي. دوی دا راز زیاته کړه، چې ځینو کړیو خپلو شومو اهدافو ته د رسېدو لپاره افغانان پر بېلابېلو تنظیمونو ووېشل، خو د اسلامي امارت په حاکمیت سره هغه ټولې ناخوالې ختمې او ورورولي په ملک کې حاکمه شوه.
د سرحدونو، قومونو او قبایلو چارو وزیر بیا د خپلې وینا په ترڅ کې افغانان په اسلامي روحیه را لوی شوي خلک وبلل ویې ویل: اسلامي امارت له فتحې وروسته د تېر اشغال هغه ناخوالې حل کړې چې شل کاله یې هغوی په حل کولو کې پاتې راغلي وو.
هغه د مهاجرینو د درنې څپې مدیریت کول د اسلامي امارت د مدبرانه سیاست بېلګه وبلله او خلک یې اخوت او ورورګلوي ته راوبلل.
