په سمنګان ولایت کې ۱۲ کلنه شخړه حل شوه
د سمنګان ولایت د مرکز اړوند په میدان بزکشي سیمه کې د دوو قومونو تر منځ ۱۲ کاله مخکې را منځته شوې بدي چې له کبله یې دوو کسانو ته مرګ ژوبله هم اوښتې وه، تېره ورځ د سرحدونو، قومونو او قبایلو چارو ریاست، ولایتي مسؤلینو او قومي مشرانو په هلوځلو په دوستي بدله شوه.
د شخړې د حل په موخه د ولایتي رهبري له لوري ولسي غونډه را بلل شوې وه، چې د مسؤلینو، دیني عالمانو او قومي مشرانو له لوري د بدیو او شخړو د بدو پایلو په اړه پکې هر اړخیزې خبرې وشوې.
مسؤلینو د غونډې په اوږدو کې د عفوې په فضیلت هم خبرې وکړې او د شخړې ښکېل لوري یې سولې ته راوبلل. د بدي دواړو لوریو د غونډې د ګډونوالو په مخ کې یو بل ته د خوښۍ غېږه ورکړه او په خپل منځ کې یې د وروڼو په څېر د ژوند تېرولو ژمنه یې وکړه.
