په سمنګان ولايت کې دوې بېلابېلې شخړې حل شوې
پنج شنبه ۱۴۴۶/۵/۱۹
په سمنګان ولايت کې د دوو کورنيو تر منځ د مهر پر سر هغه ۱۴ کلنه شخړه هواره شوه، چې د دغه کورنيو ترمنځ يې ژور خپل منځي اختلافات راپورته کړي وو. د دغه ولايت د سرحدونو، قومونو او قبايلو چارو د آمر الحاج مولوي شمس الرحمن ستانکزي په هڅو د قومي مشرانو او علماوو په همکارۍ ياده شخړه هواره شوه او د طرفينو په رضايت د مهر حق ادا شو.
په ورته مهال د ياد ولايت مرکز ايبک کې هم یوه شخړه د دغه ولايت د سرحدونو، قومونو او قبايلو چارو آمريت په مشرۍ د شخړو د حل کميسيون او قومي مشرانو په منځګړيتوب د يوې جوړې شوې غونډې په ترڅ کې حل او فصل شوه.
د يادې غونډې پرمهال مسؤلينو د سولې، ورور ولۍ، عفوې اوبښنې په تړاو هر اړخېزې خبرې وکړې او ښکېل اړخونه يې وهڅول، چې د دښمنۍ پرځاي د دوستۍ لار غوره کړي، چې په همدې ترتيب له غوندې وروسته د يوې عادلانه پريکړې له مخې دواړه طرفونه سولې ته راضي شول او د خوښۍ غاړې يې سره ورکړې.
