په زابل ولایت کې د نقشبندیه سیف الاسلام مدرسې د حافظانو د فراغت مراسم ترسره شول
۲۹/شوال المکرم/ ۱۴۴۴
د زابل ولایت په شاجوی ولسوالي کې د چینو د سیمې په نقشبندیه سیف الاسلام مدرسه کې د (۲۹) تنو قاریانو د فراغت مراسم ترسره شول، د یادو قاریانو له جملې څخه (۴) تنه نجونې او (۲۵) تنه یې هلکان وو. په دغو مراسمو کې د سرحدونو، قومونو او قبایلو چارو سرپرست وزیر الحاج ملا نورالله نوري، د زابل ولایت د مرافعې رئیس شیخ نقیب الله اخندزاده، د شاجوی ولسوالي د مرکزي فقهی مجلس رئیس شیخ رحمت الله اخندزاده د نورو دولتي ادارو مسؤلینو، علماء کرامو او د سیمې سلګونه خلکو ګډون کړی وو. په پیل کې څو تنو دیني عالمانو د تېر اشغال، خپلواکۍ او علم پر ارزښت مفصلې خبرې وکړې. دوی عالمان د نبي علیه السلام وارثان یاد کړل او په اخیر کې یې فارغ شویو حافظانو ته د حاصل کړي فضیلت مبارکي وویله. ور پسې د یاد شوي وزارت سرپرست ښاغلي نوري یادې ناستې ته په خپله وینا کې وویل: دلته شل کلنې قربانۍ د دې لپاره وې چې خپلواکي، اسلامي نظام، د افغانانو د عزت او نوامسو د ساتنې او د اعلاء د کلمة الله لپاره وې، هغه زیاته کړه: دا د شکر ځای دی چې د امنیت او اسلامي نظام تر سیوري لاندې په یوه ډاډمنه فضاء کې د فراغت مراسم لمانځو، مخکې مو داسې مراسم بمبار کېدل او په ارامه مو نه شوای لمانځلی. نوموړي همدا راز وویل: د ا.ا.ا د هیواد له قومونو او ولس څخه را پورته شوی نظام دی شکر یې پر موږ او تاسې ټولو لازم دی، دا چې اوس امنیت تأمین دی د هیواد سیاحتي سیمو ته په زرګونو سیلانیان راځي. هغه له مسؤلینو څخه وغوښتل چې د ولس حقونو ته دي پاملرنه وکړي او له خلکو سره دي نېک چلند کوي. په اخیر کې د یادې مدرسې سرپرست عتیق الرحمن شهاب له راغلیو ملیمنو څخه مننه وکړه چې له دوی سره یې ګډون کړی و او فارغ شویو حافظانو ته یې د مبارکي تر څنګ د عمل توفیق وغوښت.
