په دې هیواد کې مېشت هر قوم زموږ د بدن د اعضاوو حیثیت لري
۳۰/۱/۱۴۴۵
په ننګرهار ولایت کې د کوچیانو د ملاخیلو، خدرخېلو او نورو قومونو مشرانو او استازو د سرحدونو، قومونو او قبایلو چارو وزارت له سرپرست وزیر الحاج ملا نورالله نوري او د کوچیانو چارو د سمون لوی رئیس مولوي ګل زرین کوچي سره د یاد وزارت د ملاقاتونو په تالار کې وکتل. راغلیو مشرانو یادې ناستې ته وویل چې دوی د اسلامي نظام په بریا او قائمولو کې ډېرې قربانۍ ورکړې او د داسي حکومت راتلل د ټولو افغانانو یوه هیله وه. دوی غونډې ته د غوښتنو په ترڅ کې وویل چې د ننګرهار ولایت په مختلفو سیمو او ولسوالیو کې د کوچیانو د ځمکو په اړه د ښاروالي له لوري د کوچي مېشتو ځمکو د بندیز او د څړځایونو د تثبیت په اړه دي بیا کتنه او غور وشي. غونډې ته د خبرو پر مهال سرپرست وزیر ښاغلي نوري د ښه راغلاست تر څنګ وویل: د افغانستان خلک د پرلپسې جګړې او انقلابونو له وجهې ډېر ستومانه شوي دي او د اسلامي نظام په حاکمولو کې د دوی سرښندنې د ستاینې وړ دي. هغه همدارنګه وویل چې په دې هیواد کې پروت هر قشر زموږ د بدن اعضاوو حیثتیت لري او موږ به یې د مشکلاتو د هواري لپاره پوره هڅه کوو. ښاغلي نوري کوچي مشرانو د ډاډ ورکولو په ډول وویل: په دې نظام کې د هیڅ چا حق نه خوړل کېږي او ستاسې د ستونزو د حل په موخه به موږ پوره غور او کوښښ کوو.
