په خوست ولایت کې له کوچي سرخېلانو سره ناسته وشوه
۱۳/۷/۱۴۴۵
د خوست ولایت د سرحدونو، قومونو او قبایلو چارو ریاست له لوري کوچیانو ته د عامه پوهاوي په برخه کې یو ورځنی سمینار جوړ شو چې پر مهال یې د یاد وزارت د کوچیانو چارو د سمون لوی رئیس مولوي ګل زرین کوچي په شمول د ګڼو محلي اداراتو مسؤلینو او د کوچيانو سرخیلانو ګډون کړی وو.
د خوست مرستیال والي مولوي محبوب شاه قانت وویل چې د اسلامي امارت له راتګ سره سم کوچیانو ته په ډېرو برخو کې خدمتونه وړاندې شوي دي. هغه زیاته کړه چې ستاسې ټول حقه حقوق به تأمین کیږي او تاسو ته به د خدماتو په برخه کې توجه لا ډېره شي.
کوچي مشرانو غونډې ته خبرې وکړې او زیاته یې کړه: د اسلامي امارت د راتګ لپاره مو ډېرې قربانۍ ورکړي دي او اوس یې د ساتنې په موخه هم په پوره توان قربانۍ ته تیار یوو.
د کوچیانو چارو د سمون لوی رئیس ښاغلی کوچي سمینار ته د خبرو پرمهال وویل: په تېرو څو لسیزو کې کوچیانو ته هیڅ توجه نه ده شوې او له اولیه خدمتونو څخه هم بې برخې وو. هغه زیاته کړه چې په خوست ولایت کې شته ستونزې به تر مرکزې ادارو او همکارو مؤسیسو پورې د حل په موخه رسوي.
