په خوست ولایت کې د مسافرو او قومي مشرانو ستونزې واورېدل شوې
۲۲/۶/۱۴۴۵
د خوست ولایت د سرحدونو، قومونو او قبایلو چارو رئیس شیخ کلیم الرحمن فاني چې د غلام خان بندر له لارې د افغان ناروغانو د کمسیون مشري پر غاړه لري، د یاد بندر له تلونکو مسافرو او د دغه ولایت له ولسي وګړو سره ناسته وکړه.
د یادې ناستې پر مهال له غلام خان بندر څخه اوښتونکو ناروغانو د لارې په اوږدو کې د شته ستونزو یادونه وکړه او له یاد کمیسیون څخه یې د لازیاتو سهولتونو برابرولو غوښتنه وکړه. په ورته وخت کې د خوست ولایت ځایي اوسېدونکو هم د حل په پار له یاد کمیسیون سره خپل مشکلات شریک کړل.
ور پسې د یاد ریاست رئیس او ټاکل شوي کمیسیون د ناروغانو ستونزې جدي وبللې په اړه یې لازم اجراات ترسره شول او د نورو ستونزو د حل ډاډ ورکړل شو. ښاغلي فاني د دغه ریاست په انګړ کې راټولو شویو ناروغانو او ولسي وګړو ته وویل: موږ په شپه او ورځ ستاسې د خدمت لپاره چمتو یو او دا اطمینان در کوو چې د ستونزو د حل په برخه کې به مو لازمې کړنې ترسره کېږي.
