په جوزجان ولایت کې د دوو کورنیو تر منځ ۳۰ کلنه شخړه حل او په سوله بدله شوه
۱۷/۱۲/۱۴۴۴
د جوزجان ولایت آقچې ولسوالۍ اړوند د دوو کورنیو ترمنځ یوه لویه شخړه او بدي چې له دریو لسیزو را په دېخوا یې دوام درلود نن د یوې ناستې په ترڅ کې په سوله بدله شوه. د دغې بدۍ په جریان کې له دواړو لوریو څخه ۵۰ تنو ته مرګ ژوبله اوښتې وه. د دغې شخړې د حل پر مهال د جوزجان ولایت د سرحدونو، قومونو او قبایلو چارو رئیس مولوي غلام نبي صمیم، دینې عالمانو، قومي مشرانو او د شخړې دواړو ښکېلو لوریو حضور درلود. ناستې ته د یاد ولایت د سرحدونو، ق، ق چارو رئیس ښاغلي صمیم وویل: دښمني او شخړه د حل لاره نه ده، زموږ ګران هیواد افغانستان د کلونو جګړې ډېر ځپلی موږ او تاسې ته اوس په کار ده چې تر مخالفتونو تېر شو یو بل ته د ورورګلوۍ لاس ورکړو او د هیواد د ابادۍ او سوکالۍ لپاره کار وکړو. نوموړي زیاته کړه: دا زموږ دنده ده چې د قومونو او خلکو تر منځ مخالفتونه ختم او شخړې حل کړو تر څو مو د خپلو مشرانو لارښوونې عملي کړې وي او ملي یووالي ته رسېدلي یو. د شخړې ښکېلو لوریو د پرېکړه لیک په لاسلیک کولو سره ژمنه وکړه چې یو له بل سره به د دوستي په فضا کې ژوند کوي او په خپلو تېرو کړنو یې پښېماني وښوده. په پای کې د قومي مشرانو او علماء کرامو له لوري د یاد ریاست د کارونو ستاینه وشوه او د هیواد د ښېرازۍ په دوعا سره غونډه پای ته ورسېده.
