په جوزجان ولایت کې د دوو کلیو تر منځ شخړه هواره شوه
۲۵/۱۰/۱۴۴۵
د جوزجان د ولایت مقام له هدایت سره سم، د مرکز شبرغان د دوو کلیو (باباعلي او ینګي کینت) ترمنځ د یوې مدرسې او مسجد د ملکیت پر سر له څه مودې راهیسې رامنځته شوې شخړه، چې د دواړو خواوو تر منځ یې مخالفتونه را پورته کړي وو، تېره ورځ د یاد ولایت د سرحدونو، قومونو او قبایلو چارو ریاست، د نورو اداراتو مسؤلینو او سیمه ییزو مشرانو په منځګړیتوب حل شوه. د دغې شخړې د حل په موخه د یاد ولایت له لوري د سرحدونو، قومونو او قبایلو چارو رئیس مولوي غلام نبي صمیم ته دنده سپارل شوې وه، چې د موضوع د حل په برخه کې اجراات ترسره کړي. نوموړي له پوره پلټنې او تحقیق وروسته له دواړه لوریو سره ناسته وکړه او د ځینو مسؤلینو او قومي مشرانو په منځګړیتوب یې دواړه خواوې د سولې او ورورولۍ په ټغر کښېنول.
