په بلخ او کاپيسا ولايتونو کې دوه جلاجلا شخړې هوارې شوې
شنبه ۱۴۴۶/۷/۱۷
د بلخ ولايت په چهاربولک ولسوالۍ کې د دوو کورنيو ترمنځ هغه يو کلنه دښمني پاي ته ورسېده، چې له يوه لوري په کې يو کس وژل شوی، څو تنه ژوبل شوي او دواړو خواوو ته پکې ګڼ مالي زيانونه اوښتي وو. دغه شخړه د ياد ولايت د سرحدونو، قومونو او قبايلو چارو رياست په همغږۍ د قومي مشرانو او علماوو په هڅو داسې مهال پای ته ورسېده، چې جرګه کوونکو ښکېل لوري د يوې غونډې له لارې سولې ته را وبللې او د ورورۍ په ټغر يې سره کښېنول.
په همدې حال کې د کاپيسا ولايت په کوه بند ولسوالۍ کې هم د ياد ولايت د سرحدونو، قومونو او قبايلو چارو آمريت مسؤلينو د ځايي خلکو او ديني عالمانو په منځګړيتوب دوه مرورې کورنۍ پخلا او دښمني يې په دوستي وربدله کړه. په دغه شخړه کې يو تن وژل شوی او څو تنه ټپيان شوي وو، چې د مصلحينو له لوري د يوې مرکې په ترڅ کې دواړه غاړې له يوې منصفانه فيصلې وروسته سره غاړه غړۍ شول.
د ښکېلو کورنيو مشرانو د ستونزو د هواري په اړه د سرحدونو، قومونو اوقبايلو چارو وزارت او محلي ادارو هلې ځلې وستايلې او غوښتنه يې وکړه، چې د ولسونو د اتفاق او يووالي لپاره دي لا نور کار هم وشي.
