په بلخ، جوزجان او باميان ولايتونو کې د دریو جلا جلا کورنيو تر منځ شخړې هوارې شوې.
شنبه ۱۷/ ۶/ ۱۴۰۳
د بلخ ولايت په مزار شريف ښار کې د دوو کورنیو تر منځ هغه شخړه حل شوه چې د درملو له کارولو وروسته یوه ناروغ خپل ژوند له لاسه ورکړی و، د بلخ ولايت د سرحدونو،قومو او قبايلو چارو رياست په هلو ځلو دا جنجالي شخړه حل او دواړو خواوو يو بل وبښل.
په ورته مهال د جوزجان ولايت په شورجر کې هم د ترافیکي پېښي له امله رامنځ ته شوې پيښه د ياد ولايت د سرحدونو، قومونو او قبايلو چارو د رئيس غلام نبي صميم، قومي مشرانو او ا.ا.ا د ځينو مسؤلينو په همکارۍ حل او فصل شوه، د وژل شوي کس کورنۍ مقابل لوری وباښه.
همدارنګه د باميان ولايت د سرحدونو، قومونو او قبايلو چارو آمريت په مشرۍ د ولسي مشرانو، علماوو او سپين ږيرو په منځګړيتوب د باميان ولايت په مرکز کې د دوو لويو قومونو ترمنځ راپورته شوی جنجال حل او دواړه طرفونه د ورورۍ په ټغر سره کيناستل.
په دغه رامنځ ته شوې شخړه کې چې د دواړو لوريو ځوانانو وهل ټکول هم پکې کړي وو له روغې جوړې وروسته يې يو بل ته بښنه وکړه او سره غاړه غړۍ شول، دوی ژمنه وکړه چې په آينده کې به هيڅ ډول تاوتريخوالی نه سره کوي او د دواړو قومونو تر منځ به په خوشحالۍ راشه درشه سره کوي.
