هیڅ چا ته اجازه نه ورکوو چې زموږ یووالی له منځه یوسي
۱۸/۱/۱۴۴۵
د سرحدونو، قومونو او قبایلو چارو وزارت د میدان وردګو ولایت د قومونو له مخورو سره د همغږۍ او د هغوی ستونزو اورېدلو په موخه یوه پراخه ولسي ناسته ترسره کړه. په دغه ناسته کې د یاد وزارت سرپرست الحاج ملا نورالله نوري، د جرګو او قبایلي چارو د همغږي معین الحاج ملا عبدالخالق عابد، مسلکي معین مولوي احمد طه قادري، د جرګو او قبایلي چارو د همغږۍ رئیس الحاج شیخ حضرت ولي حقاني، مل پلاوي، د میدان وردګو مرستیال والي حافظ سیدالرحمن، ولايتي مسؤلینو، د مرکز او ولسوالیو څخه راغلیو قومي مشرانو، علماء کرامو او ځوانانو ګډون کړی وو. په پیل کې مرستیال والي حافظ سیدالرحمن راغلي پلاوي او قومي مشرانو ته د ښه راغلاست ترڅنګ وویل چې د یاد ولایت ټول قومونه د یووالي او امن په ټغر راټول دي او د خلکو ستونزو ته رسېدنه خپله دنده بولي. ورپسې د علماوو او قومي مشرانو په استازیتوب څو تنو خبرې وکړې د ولسونو تر منځ اتحاد، سرتاسري امنیت او قومي شخړو هواري په برخه کې د اسلامي امارت هڅې یې بې سارې یاد کړل او ویې ویل: د امن له برکته د هر چا مال، ځان، عزت او ابرو خوندي دي او ټول قومونه د ورورولۍ په فضاء کې ژوند کوي. د دوی له جملې یوه تن شعیه مشر وویل: موږ له موجوده حکومت څخه ملاتړ کوو، ورڅخه خوښ یو او د اسلامي نظام راتګ زموږ لپاره یو افتخار دی. دوی ټولو له پلاوي څخه د سنګلاخ او چک بندونو رغولو، ۲۰۰ بستریز روغتون د کارونو پیلولو، محرومو سیمو او نورو پراختیایي کارونو ته د پاملرنې غوښتنه وکړه. ور پسې د جرګو او قبایلي چارو معین ښاغلي عابد اسلامي نظام د الله (ج) یوه پیرزوینه وبلله او ویې ویل: د غربیانو د غرور چمبې پر افغانستان باندې خښې شوې وې خو د دې غیور ولس په اتفاق او سرښندونو دا هیواد له هغوی څخه پاک او اسلامي نظام پکې قائم شو. وروسته د یاد وزارت مسلکي معین ښاغلي قادري وویل چې د نظام د بقا لپاره له ولس سره د ناستو څخه زموږ هدف د دوی تر منځ د وحدت ټينګول دي. هغه له مېشتو قومونو څخه وغوښتل چې د اسلامي امارت تر څنګ ودرېږي. په پای د یاد وزارت سرپرست ښاغلي نوري د اشغال پر وړاندې د یاد ولایت قربانۍ بې ساري وبللې او د اسلامي نظام قائمېدل یې د دوی د سرښندنو برکت یاد کړ. هغه وویل: د افغانستان ټول قومونه او ملیتونه د دې هیواد سرمایه ده او موږ هیڅ چا ته اجازه نه ورکوو چې زموږ یووالی له منځه یوسي. ښاغلي نوري د دوی د ستونزو اړوند ډاډ ورکړ چې د بند اړوند پروژې یې منظورې شوې دي او نورو ستونزو ته به یې هم جدي توجه کیږي.
