ننګرهار کې ۱۳کلنه دښمني په دوستۍ بدله شوه
پنجشنبه ۱۴ شعبان ۱۴۴۶
دننګرهار ولايت په دره نور ولسوالۍ کې د دوو کورنيو ترمنځ هغه ديارلس کلنه دښمني په دوستۍ بدله شوه، چې له امله يې دواړو خواوو څخه دوه تنه وژل شوي دوه ټپيان او د ګڼو مالي زيانونو سره سره يې ترمنځ ژور اختلافات موجود وو.
د دغې شخړې د هوارولو په موخه د سرحدونو، قومونو او قبايلو چارو وزارت د جرګو او قبايلي چارو د همغږۍ مرستيال الحاج مولوي محمد علي جان احمد په مشري د ننګرهار د سرحدونو، قومونو او قبايلو چارو رئيس حافظ رحمت الله غازي عمر، قومي مشرانو، علماوو او ځايي خلکو په شتون کې.
د يوې لويې غونډې پر مهال د منصفانه پرېکړې له مخې دواړه لوري سره خوشاله شول او په همدې سره يې ياده ديارلس کلنه دښمني په دوستۍ بدله شوه.
د غونډې پر مهال ښاغلي احمد ولسونه يووالي، اتفاق او ورور ولۍ ته وهڅول او له هغوی يې غوښتنه وکړه، چې د دښمنيو او شخړو پرځای سوله ييز ژوند غوره کړي ځکه په دې کې د دنيا او اخرت خوشحالۍ نغښتې دي.
