ننګرهار کې د ۳۰ کلنې شخړې سربېره يوه بله ۱۷ کلنه شخړه حل او کنړ کې هم دوې مرورې کورنۍ پخلا شوې

چهار شنبه ۱۲ صفرالمظفر ۱۴۴۷ په ننګرهار ولايت کې د دوو کورنيو ترمنځ د شاوخوا ۳۰ کلونو په دوام هغه اوږدمهاله شخړه حل شوه، چې له کبله يې يو کس وژل شوی و او ګڼې ستونزې يې را ولاړې کړې وې. د ياد ولايت د سرحدونو، قومونو او قبايلو چارو رياست مسؤلينو، قومي مشرانو، علماوو او متنفذينو په دوامداره هڅو لومړی ښکېل لوري سولې ته وهڅول او بيا يې ترمنځ د يوې منصفانه پرېکړې په اساس عادلانه فيصله وکړه، چې د دواړو خواوو د خوښي سبب وګرځېده او په همدې توګه يې د ورورولي غاړې ورکړې. همداراز د دياد ولايت په حصارک ولسوالي کې هم د دوو کورنيو ترمنځ هغه ۱۷ کلنه شخړه هواره شوه، چې له دواړو خواوو پکې دوه تنه وژل شوي يوبل ټپي شوی او ګڼې ستونزې يې هم درلودلی، چې مسؤلينو يې ترمنځ د سولې او ورورولي په په فضا کې فيصله وکړه او دواړو لوريو يوبل وبښل. په ورته مهال د کنړ ولايت په دانګام ولسوالۍ کې د دوو مرورو کورنيو ترمنځ داسې مهال پخلاينه ترسره شوه، چې د روغې جوړې په مراسمو کې يې د ياد ولايت د سرحدونو، قومو او قبايلو چارو رياست استازو، قومي سپين ږيرو او ګڼو ځايي خلکو حضور درلود. د دغه شخړې په پايله کې له دواړو لوريو څو تنه ټپيان شوي وو او د ګڼو مالي تاوانونو ترڅنګ يې ترمنڅ لوی اختلافات هم موجود وو، چې مسؤلينو ورته د پای ټکی کېښود