په ننګرهار کې د قتل یوه موضوع حل شوه
شنبه/ ۱۷ / شوال/۱۴۴۷
د ننګرهار ولایت مهمندرې ولسوالۍ د دوو کورنیو ترمنځ څه موده وړاندې د ماشومانو پر سر پېښه شوې فزیکي شخړه، چې له امله یې یو تن وژل شوی هم و، تېره ورځ د یوې دودیزې جرګې پرمهال حل شوه.
دغه شخړه چې د دواړو خواوو د جنجال له امله لویه لانجه ترې جوړه شوې وه، د یاد ولایت د سرحدونو، قومونو او قبایلو چارو ریاست مسؤلینو، سیمه ییزو مشرانو او دیني عالمانو یې منځګړیتوب وکړ او د موضوع د حل لپاره یې یوه ناسته راوبلله.
قومي مخورو د ښکېلو لورو د موضوع له پوره څېړنې وروسته د دوی ترمنځ د قناعت وړ فیصله وکړه او دواړه لوري یې حوصلې او ګذشت ته راوبلل، چې په دې سره د مشرانو د درناوي په خاطر طرفینو یو بل ته بښنه وکړه او د ورورۍ غېږې یې سره ورکړې.
دا په داسې حال کې ده، چې د سرحدونو، قومونو او قبایلو چارو وزارت د خپلو ولایتي ریاستونو، آمریتونو او د شخړو د حل کمیسیون له لارې په ورځني ډول کوښښ کوي چې د خلکو ترمنځ خپلمنځي اختلافات، شخړې او جنجالونه حل کړي ترڅو هیوادوال له بدیو او تربګنیو خلاص د اتحاد او یووالي له ژوند څخه برخمن شي.
