موږ هوډ من یو، چې ستاسو ځوانانو لپاره د زده کړې مناسب چاپېریال او ښه شرایط رامنځته کړو!
دغه څرګندونې د سرحدونو او قبایلو چارو وزیر ښاغلي محب الله صمیم نن له غرمې وروسته له قبایلي ځوانانو سره د کتنې په ترڅ کې وکړې، زیاته یې کړه: تاسي روڼ اندی قشر، چې نن د زده کړې ترلاسه کولو پسې راوتي یاست باید په دې پوه اوسو، چې له شته ستونزو، وروسته پاتې والي او روانو ناخوالو څخه د وتلو یوازینۍ لار د پوهې په ګاڼه ځان سینګارول دي.
موږ هوډمن یو، چې تاسو ځوانانو ته د لوړو زده کړو په موخه بورسونه برابر او د زده کړې مناسب چاپېریال او بهتر شرایط رامنځته کړو بشپړ باور لرم، چې تاسو ځوانان کولای شئ، چې د لوړو نمرو په ترلاسه کولو سره په ازموینه کې بریالي شئ.
ورپسې د نجونو په استازیتوب اغلې ډاکټر ګل ناز خبرې وکړې او د ښوونې او روزنې په برخه کې د اسانتیاوو رامنځته کولو په موخه یې د سرحدونو او قبایلو چارو وزارت هلې ځلې وستایلې او د وزارت له مشرتابه څخه یې غوښتنه وکړه، چې دوی ته د لوړو زده کړو لپاره زیات بورسونه چمتو کړي.
دغه راز په کتنه کې له پښتونخوا څخه ګڼو راغلیو ځوانانو هم د لوړو زده کړو په موخه خپلې یو لړ غوښتنې او وړاندیزونه د وزارت له مشرتابه سره شریک کړل.
