له غلام خان بندر او ډیورنډ فرضي کرښې څخه لیدنه
۲۶/۱۱/۱۴۴۵
د سرحدونو، قومونو او قبایلو چارو سرپرست وزیر الحاج ملا نورالله نوري خوست ولایت ته د خپل سفر پر مهال د ګربز ولسوالۍ اړوند غلام خان بندر او ډیورنډ فرضي کرښې ته څېرمه سیمې په داسې حال کې وکتلې، چې د ولایت د استخباراتو رئیس مولوي لطف الله معصوم اخندزاده، د غلام خان بندر کمیسار مولوي قطب خان بلال، د غلام خان بندر د کنډک مسؤل مولوي مؤمن احمد وارث او نورو مسؤلینو هم حضور درلود.
په دغه کتنه کې سرپرست وزیر پر ډېورنډ فرضي کرښه باندې له حاکمو نقطو، د کمیسارۍ له نویو تأسیساتو او کنډک څخه د لیدنې تر څنګ له ځایي مسؤلینو سره هم خبرې وکړې او په یاده سیمه کې یې امنیتي مسؤلینو او مجاهدینو ته د هیواد د پولو د ساتنې او د دوی د سپېڅلې وظیفې په اړه مهمې سپارښتنې وکړې.
نوموړي په خپلو خبرو کې امنیتي ساتونکو ته وویل: تاسې د هغې سیمې او نقطې ساتونکي یاست چې له امله یې په ټول هېواد کې امن حاکم دی، ستاسې شتون هېوادوالو ته د آرام ساه ورکوي او د وطن بقاء او ثبات تضمینوي.
