په ولسوالیو کې د اسلامي شریعت د تطبیق او ولسي همغږي په موخه د عامه غونډو  روانه لړۍ

دوشنبه ۸ ربیع الآخر ۱۴۴۸

د سرحدونو، قومونو او قبایلو چارو وزارت د خپلو ولایتي او محلي ادارو په همکاري د هېواد په بېلابېلو ولایتونو کې د ولسوالیو په کچه د اسلامي شریعت د تطبیق، ولسي همغږي او د اسلامي نظام د لارښوونو په اړه د عامه پوهاوي غونډو لړۍ په دوام د بلخ په زاري ولسوالي، د فراه په اناردره، د سمنګان په خلم او دره صوف، د بادغيس په بالامرغاب، د کندهار په ريګستان او د پنجشير په رخه ولسوالي کې له دیني عالمانو، قومي مخورو، ولسي استازو او ځایي مسؤلینو سره غونډې ترسره شوې.

په دغو غونډو کې سيمه ييزو مشرانو د خپلو سیمو اړوند غوښتنې او ستونزې مطرح کړې، د ولس او ادارو ترمنځ یې په لا زیاتې همغږي ټینګار وکړ. وي ويل: د اسلامي ارزښتونو د پیاوړتیا او د ولسونو ترمنځ د اتفاق لپاره د علماوو او قومي مشرانو هڅې مهمې دي. دوی زياته کړه، چې د اسلامي شریعت د احکامو د عملي کېدو او د ولسي همکاري د پراختیا په برخه کې به خپلې هڅې دوامداره وساتي.

همداراز ګډونوالو د اسلامي نظام د لارښوونو پر اهمیت خبرې وکړې او له خلکو یې وغوښتل چې د اختلافاتو د مخنیوي او ولسي یووالي په ټینګښت همکار واوسي. دوی ټینګار وکړ، چې د خلکو ترمنځ ګډه همکاري کولای شي د ټولنې د ثبات لپاره زمینه نوره هم پیاوړې کړي.

بل لور ته د غونډو پر مهال مسؤلینو د ولسونو ستونزې واوريدې او د شته امکاناتو تر کچې یې د حل په اړه د همکاري ډاډ ورکړ. مسؤلینو له ګډونوالو وغوښتل چې د یووالي، اتفاق او همغږي فضا پیاوړې کړي او د اسلامي شریعت د احکامو د عملي کېدو په برخه کې له اړوندو ادارو سره همکاري وکړي. دوی د دیني عالمانو، قومي مخورو او ولسي استازو رول مهم وباله او ټینګار یې وکړ، چې د ولس او ادارو ترمنځ دوامداره اړیکه د ګډو موخو د ترلاسه کولو لپاره اړینه ده