له افغان ماشومانو سره د مرستې په برخه کې هوکړه وشوه
دوشنبه۲۲ رمضان المبارک
د سرحدونو، قومونو او قبایلو چارو وزارت د جرګو او قبایلي چارو د همغږۍ معین مولوي محمدعلي جان احمد د افغان ماشومانو په برخه کې د جرمني مؤسیسې له مرستیال الحاج مصطفی سره، په لرې پرتو سیمو کې له بیوزلو خلکو، کوچي قشر، راستنو شویو مهاجرینو او په طبیعي پېښو کې زیانمن شويو هېوادوالو ته د مرستو رسولو په برخه د دوه اړخیزه همکارۍ او همغږۍ هوکړه لیک لاسلیک کړ.
په پیل کې ښاغلي الحاج مصطفی د یادې مؤسیسې د فعالیتونو د څرنګوالي په اړه معلومات ورکړل او د بېلابېلو سیمو بې وزله او له طبیعي پېښو زیانمن شوي خلکو ته د مرستو رسولو په اړه یې توضیحات وړاندې کړل.
ورپسي د سرحدونو، قومونو او قبایلو چارو وزارت د جرګو او قبایلي چارو د همغږۍ معین ښاغلي احمد د یادې موسیسې له خوا پر عملي فعالیتونو د ټینګار ترڅنګ وویل چې په ولایتونو کې دې په یادو برخو کې د خلکو اساسي اړتیاوې په پام کې ونیول شي او همکاري دې ورسره وشي.
