له افغانستان څخه د بهرنیو ځواکونو د وتلو او د افغانانو د ازادۍ په مناسبت د مبارکۍ پیغام!
بسم الله الرحمن الرحيم
د زیات ویاړ او خوښۍ ځای دی، چې د روان ۱۴۴۳هجري قمري کال د محرم الحرام په ۲۲مه نېټه، چې د ۱۴۰۰ لمریز کال د وږي له ۹مې نېټې سره سمون خوري، له ګران هېواد افغانستان څخه د امریکا په مشرۍ د بهرنیو ځواکونو وروستۍ عسکر ووت، چې په دې سره په افغانستان کې د بهرنیو ځواکونو شل کلن پوځي اشغال پای ته ورسېد او دغه ورځ د هېواد په ویاړلي تاریخ کې د افغانستان د ازادۍ د ورځې په توګه ثبت شوه.
پوره شل کاله وړاندې د امریکا او ناتو ځواکونو د ټولو نړیوالو اصولو او قوانینو خلاف زموږ په ګران هېواد باندې وسله وال وحشیانه تېری وکړ، چې له امله یې په هېواد کې زموږ اسلامي نظام له منځه لاړ، او زموږ زرګونه تنه بې ګناه او معصوم هېوادوال یې شهیدان، ټپیان او مهاجر کړل، خو په پای کې د افغانستان مجاهد ملت په مېړانه د دوې په وړاندې مقدس جهاد پیل او له شلو کلونو وروسته یې دوې ته د لوی الله ج په نصرت او مرسته، شرموونکې ماتې ورکړه او دوې یې له هېواد څخه تېښتې ته اړ کړل.
د سرحدونو او قبایلو چارو وزارت يو ځل بيا د دغې وياړلي ورځې په مناسبت خپلې ښې مبارکۍ او نیکې هېلې د افغانستان اسلامي امارت ټولو مجاهدینو او د هېواد سرلوړي ملت ته وړاندې کوي او په ټولو افغانانوغږ کوي، چې په نه ستړي کېدونکو هلوځلو سره د دغه جګړه ځپلي هېواد په بیا آبادولو او پرمختګ کې فعاله ونډه واخلي، ځکه دا خاوره په مونږ حق لري او ساتل یې زموږ د ټول ګډ مسوولیت دی.
و من الله توفیق
الحاج معاون ملا عبدالجبار
د سرحدونو او قبایلو چارو د کمېسیون عمومي مسوول
د مطبوعاتو څانګه
