لغمان کې څلور کلنه شخړه پای ته ورسېده
شنبه ۱۵ صفرالمظفر ۱۴۴۷ د لغمان ولايت د سرحدونو، قومونو او قبايلو چارو آمريت مسؤلينو لخوا د قومي مشرانو په منځګړيتوب د ياد ولايت په دولت شاه ولسوالۍ کې د دوو کورنيو ترمنځ د شاو خوا څلورو کلونو په دوام شخړه حل او دواړو خواوو د ورورولي لاسونه سره ورکړل. د غه شخړه، چې څو کلونه وړاندې د يوه واده پرمهال رامنځته شوې وه او له کبله يې يو کس خپل ژوند له لاسه ورکړی و، تېره ورځ د يوې غونډې په ترڅ کې د اسلامي امارت د مسؤلينو له لوري هواره او ښکېلو طرفونو يوبل ته بښنه وکړه. د ياده دواړو کورنيو مشرانو د شخړو د هواري په برخه کې د سرحدونو، قومونو او قبايلو چارو وزارت او اړوندو محلي ادارو هڅې وستايلې او غوښتنه يې وکړه، چې د ولسونو هره وړه او لويه ستونزه دې همداسې په سوله ييزه توګه حل او فصل شي.
