سرحدونو، قومونو او قبایلو چارو وزیر د بګرام ولسوالۍ له قومي مشرانو سره وکتل.
یکشنبه ۱۲/۳/۱۴۴۶
د سرحدونو، قومونو او قبایلو چارو وزیر الحاج ملا نورالله نوري نن مخکې له غرمې د وزارت د کتنو په تالار کې د پروان ولایت بګرام ولسوالۍ له ځایي قومي مشرانو سره وکتل.
په دغه کتنه کې ځایي مشرانو وویل چې په مختلفو دورو کې د بګرام د هوایي ډګر او نورو تأسیساتو رغولو پرمهال د دوی کرنیزې ځمکې لاندې شوې او دا چې دوی د شل کلن اشغال په اوږدو کې مهاجرتونه کړي وو، په ځينو برخو کې یې ملکیتونه د نورو خلکو لاس ته لوېدلي. راغلیو مشرانو هیله څرګنده کړه چې په یاده برخه کې دي دوی ته غور او پاملرنه وشي.
ښاغلي نوري سیمه ییزو مشرانو ته له هرکلي وروسته وویل: دغه وزارت د ولس غږ دی او زموږ هڅه همدا ده چې د خلکو غږ تر حکومته ورسوو او ملاتړ یې وکړو. نوموړي قومي مشرانو ته ډاډ ورکړ، چې غوښتنې به یې اړوندو ادارو ته رسوي، تر څو د یادې موضوع په اړه پوره غور وشي او د دوی حقوق خوندي شي.