د کندز ولایت په قلعه ذال ولسوالۍ کې شخړه حل شوه
د کندز ولایت په قلعه ذال ولسوالۍ کې د څړ ځایونو پر سر د دوو کورنيو ترمنځ رامنځته شوې شخړه د دې ولايت د سرحدونو، قومونو او قبایلو چارو ریاست د رئیس مولوي احسان الله ثاقب او قومي مشرانو په همکارۍ حل شوه.
په همدې موخه جوړه شوې غونډه کې مولوي احسان الله ثاقب د شخړې د دواړو لوريو ترمنځ د سولې په برخه کې د ځایي قومي مشرانو او منځګړو له هڅو څخه د مننې ترڅنګ د يادو لوريو تر منځ د تلپاتې سولې د دوام او ټينګښت غوښتنه وکړه.
په پای کې له اوږدو خبرو او بحثونو وروسته دواړه کورنۍ سره پخلا شوې او ډاډ یې څرګنډ کړ چې وروسته له دې به په خپلو منځونو کې شخړه نه کوي او د خپلو مشرانو پریکړو ته به په درنه سترګه ګوري.
