د کار او ټولنیزو چارو وزارت له استازو سره ناسته
۲۳/۶/۱۴۴۵
د کار او ټولنیزو چارو وزارت له لوري ټاکل شوي پلاوي د سرحدونو، قومونو او قبایلو چارو وزارت د یو شمېر ریاستونو له استازو سره د کار د قانون او د کارکوونکو د حقوقو په اړه ناسته وکړه.
په دغه ناسته کې د راغلي پلاوي په مشرۍ ښاغلي نظر محمد خزان د یاد وزارت د غیر حکومتي مؤسسو آمر د وزارت د ټولو کارکوونکو د امتیازاتو په اړه خبرې وکړې، د دوی هڅونه او پر وخت د معاشاتو او نورو امتیازاتو ورکړه یې د کارکوونکو حق یاد کړ. نوموړي وویل: که چیرته د دولتي کارکوونکو مالي مصارفات پر وخت تادیه او په خپلو کارونو کې وهڅول شي په رسمي چارو کې به هیڅ ډول خنډ را منځته نه شي.
بل خوا بیا د وزارت د بشري سرچینو رئیس مولوي کریم شاه تیلوي د راغلي پلاوي له لارښوونو او همکارۍ څخه مننه وکړه او د کارکوونکو د کاري ظرفیت لوړونې په برخه کې یې له یاد وزارت څخه د ورکشاپونو او سیمنارونو د دایرولو غوښتنه وکړه.
