د پکتیکا ولایت د بېلابېلو ولسوالیو له قومي مشرانو او مخورو سره کتنه!
د سرحدونو او قبایلو چارو وزارت د جرګو او قبایلو چارو د همغږۍ مرستیال ښاغلي محمد یعقوب احمدزي نن چهار شنبې د ۱۳۹۸ لمریز کال د لړم میاشتې په ۲۲ مه نېټه د پکتیکا ولایت د ارګون، زېړوک، ګوملې، برمل، خیرکوټ او یحی خېلو ولسوالیو له قومي مشرانو سره د خپل کار په دفتر کې وکتل.
په دې غونډه کې تر ښه راغلاست وروسته د راغلو قومي مشرانو او مخورو به استازیتو ښاغلي حاجي ملاخېل او نورمحمد ذکي خبرې وکړې، نوموړو په خپلو خبرو کې سیمه ییزې ستونزې له ښاغلي احمدزي سره شریکې کړې وې ویل: چې پاکستانیو ځواکونو د ډیورنډ فرضي کرښې دیخوا ددغه ولایت په ځینو سرحدي ولسوالیو کې سر غړونې کړي دي او له کرښې هم مخته راغلي.
دوی همدا راز له امنیتي ځواکونو څخه خپل ملاتړ څرګند کړ. وړاندیز یې دا وه، چې د دوی د ولسوالیو په اړوند سرحدي سیمو کې دې د محلي اردو ته د امنیت د تامین دنده وروسپارل شي.
ژمنه یې وکړه، چې د تل په څېر به له خپل پلرني ټاټوبي څخه دفاع او ساتنه کوو او چاته به اجازه ورنه کړو چې زموږ د خاورې د یوې لویشتې لاندې کولو خیال هم وکړي. غوښتنه یې وکړه، چې ستونزې د حل په موخه د حکومت له مشرانو سره شریکې کړي.
ورپسې د سرحدونو او قبایلو چارو وزارت د جرګو او قبایلي چارو د همغږۍ مرستیال ښاغلي محمد یعقوب احمدزي په خپلو خبرو کې د یادو قومي مشرانو ستونزې پر ځای وبللې وې ویل: افغانستان د تاریخ په اوږدوکې د تاسو په شان شملورو ساتلی د ستوزو په هوارې کې مو د جرګو او مرکو او یو ځای مشورو له لارې سره کار کړی.
ستاسو درنو مشرانو نه مو هیله داده، چې خپلې شته ستونزې مو د حل په موخه په لیکلې بڼه راوستوې، تر څو د سرحدونو او قبایلو چارو وزارت مشرتابه ورته د حکومت د مشرانو سره یو ځای د حل لارې چارې پیدا کړي.
همدا راز د سرحدونو او قبایلو چارو وزارت د دولت او ولس تر منځ د پولې حیثیت لري نو هڅه مو داده، چې ستاسو درنو مشرانو ستونزو ته د حل لارې پیدا کړو او په راتلونکي کې به د دې ستونزې د حل په موخه د نورو ادارو له استازو سره یو ځای د پکتیکا ولایت د ځینو ولسواليو حالت له نږدې وڅېړو او ستاسو ستونزې به کټ مټ لوړپوړو مقاماتو ته په لیکلي بڼه ورسوو.
