د پکتیا ولايت له يو شمېر قومي مشرانو، مخورو او ځوانانو سره کتنه!
د سرحدونو او قبایلو چارو وزیر ښاغلي محب الله صمیم نن له غرمې وروسته د خپل کار په دفتر کې د پکتیا ولایت د زرمت ولسوالۍ له یو شمېر قومي مشرانو، مخورو او ځوانانو سره وکتل.
په دې کتنه کې دغو مشرانو له شته نظام څخه د ملاتړ او په هېواد کې د دایمي اوربند د ټینګښت د غوښتنې په ترڅ کې د وزارت په اړوندو لېسو کې د دغو سیمو ځوانانو ته د وزارت له خوا د زیاتې ونډې له امله له ښاغلي صمیم څخه د مننې ترڅنګ وویل: موږ همیشه په هېواد کې د باعزته سولې د ټینګښت او دایمي اوربند لپاره خپل غږ اوچت کړې او په دې برخه کې د سرحدونو او قبایلو چارو وزارت له پروګرامونو څخه ملاتړ او همکارۍ ته دوام ورکوو.
ورپسې د سرحدونو او قبایلو چارو وزیر ښاغلي صمیم د نوموړو له ملي احساس څخه د منننې په ترڅ کې وویل: د وزارت د لېسو دروازې ستاسو د بچیانو د روزنې لپاره همیشه پرانیستې دي ، کوښښ به مو دا وي چې په لېسو کې ستاسو بچیانو ته زیاته ونډه ورکړو، ترڅو هېواد د همدغو ځوانانو په روزلو سره پرمختګ وکړي .
ښاغلي صمیم دا هم وویل: چې هېواد په حساسو شېبو کې دی، د دې نظام په پایښت کې ستاسو مشرانو رول ټاکوونکی دی، ټول افغانان باید منسجم او په یوه غږ د خپل نظام او امنیتي ـ دفاعي ځواکونو څخه کلک ملاتړ وکړي.
دغه راز مو په دې وروستيو وختونو کې بېلابېلو ولايتونو ته رسمي سفرونه کړي، چې په ترڅ کې يې د هېواد د ملي ارزښتونو او ملي بنسټونو په ساتلو او د باعزته سولې او دايمي اوربند په برخو کې مو د هېواد د مختلفو اقشارو نظريات او سلا مشورې اخیستې ، چې ټول افغانان په هېواد کې له جګړې ستړي دي او تلپاتې اوربند غواړي.
