د هېواد د بېلابېلو ولايتونو له ځوانانو او ټولنيزو فعالانو سره کتنه!

د سرحدونو او قبایلو چارو وزیر ښاغلي محب الله صميم نن پنجشنبې د 1399 لمریز کال د ليندۍ میاشتې په 20مه نېټه د هېواد د بېلابېلو ولايتونو له یو شمېر ځوانانو، ټولنيزو فعالانو او مخورو سره د خپل کار په دفتر کې وکتل.

په دې کتنه کې راغلو ځوانانو او مدني فعالانو د زده کړې او وزګارتيا په برخو کې خپلو يو لړ ستونزو شریکولو ترڅنګ، د سرحدونو او قبایلو چارو وزارت د مشرتابه کړنې او فعالیتونه، چې په بېلابېلو ولایتونو کې یې ترسره کړي دي، د ستاینې وړ وبلل.

همدا راز نوموړو له موجوده نظام ځخه د ملاتړ تر څنګ ډاډ ورکړ، چې په بېلابېلو برخو کې به له وزارت سره خپلو همکاريو ته دوام ورکړي.

ورپسې د سرحدونو او قبایلو چارو وزیر ښاغلي محب الله صميم په خپلو خبرو کې د یادو ځوانانو ستونزې پر ځای وبللې او د دوی له ملي احساس څخه، چې د هېواد د آبادۍ او سولې د ټینګښت په برخه کې لري مننه او قدرداني وکړه، وې ویل: موږ هر یو باید خپل مسؤلیتونه، چې د هېواد او خلکو پر وړاندې یې لرو په سمه توګه ترسره کړو، ځکه چې زموږ ولسونو د خپل هېواد او خاورې د ساتلو په موخه قربانې ورکړي او په دې برخه کې یې نه ستړې کیدونکې هلې ځلې کړي دي.

ښاغلي صمیم زیاته کړه موږ به تل د خپلو خلکو په تېره بيا د ځوانانو د هوساینې او راتلونکي د ښه والي لپاره هلې ځلې وکړو.