د هیواد په ګڼو ولسوالیو کې له کلیوالو مشرانو او قومي سپین ږیرو سره ناستې
پنجشنبه/ ۲/ ربيع الثاني ۱۴۴۷
د سرحدونو، قومونو او قبایلو چارو وزارت اړوند ولایتي ریاستونو او آمریتونو له پلان سره سم، د هیواد د (۸) ولایتونو په مختلفو ولسوالیو کې له ځورېدلو قومونو، کلیوالو سپین ږیرو او قومي مشرانو سره د (ولسي یووالي او د خلګو ستونزو ته د رسېدنې) ترعنوان لاندې ولسي او قومي غونډې راوبللې ترڅو د کلیوالو سیمو او ولسي وګړو ستونزې له نږدې واوري، پر دوی له پوښتنه وکړي او د دوی اولیه ستونزې په نښه او راټولې کړي.
په دې موخه د دغې اوونۍ په لړ کې د بامیانو په یکه ولنګ، د کندهار په معروف او ارغسان، د سمنګان په فیروزنجیر، د پکتیکا په تروې، مټاخان، خیرکوټ، یوسف خېلو، وړممۍ، یحیی خېلو او وازیخوا، د هرات په کشک رباط سنګي، د ننګرهار په بټي کوټ، د ارزګان په ګیزاب او د بادغیس ولایت په سنګ آتش ولسوالۍکې غونډې وشوې.
په یادو غونډو کې ولسونو او کلیوالو مشرانو د اسلامي نظام تر سیوري لاندې ژوند کول یو افتخار وباله زیاته یې کړه؛ چې دوی د دې نظام هرې غوښتنې او امر ته لبیک وایي او لکه څنګه چې د جهاد پرمهال د خپلو مجاهدینو ترڅنګ ولاړ وو، اوس به هم د نظام د قوت مټې وي. دوی په ولسوالیو کې د وروسته پاتې والي یادونه وکړه او د سرکونو، پلچکونو، کلینکونو او تعلیمي مرکزونو د رغولو او له بې وزله کورنیو سره د مرستې په باب له حکومت څخه د همکارۍ غوښتنه وکړه.
ولایتي مسؤلینو، ولسوالانو او د سرحدونو، قومونو او قبایلو چارو رئیسانو او آمرینو د خلکو له ملاتړ او د نظام د پایښت او استحکام په برخه کې د ولسونو له همیشنۍ همکارۍ او همغږۍ څخه قدردانی وکړ ویې ویل؛ چې د افغانستان خلکو دا ثابته کړې چې دوی لویو قوتونو ته هیڅ نه تسلیمېږي او تل یې له خپلې خاورې او خلکو څخه په دفاع کې کمزوري نه ده کړې. مسؤلینو د امیرالمؤمنین شیخ صاحب حفظه الله د بدو دودونو د مخنیوي فرمان توضیح او دوی ته ووېشو او ګډونوالو ته یې ډاډ ورکړ چې اسلامي امارت به د خپلو امکاناتو په چوکاټ کې د خلکو اولیتونو ته په کتلو سره د دوی ستونزو ته رسېدنه وکړي.
