د ننګرهار په اچين ولسوالي کې د نږدې یوې پېړۍ او د کنړ په شلتن کې د شاوخوا ۲۰ کلنې شخړې پای
يکشنبه ۷ ربيع الأول ۱۴۴۷
د ننګرهار ولایت د سرحدونو، قومونو او قبايلو چارو ریاست مسوولینو، دیني عالمانو، قومي مشرانو او متنفذینو په هڅو د دغه ولايت په اچین ولسوالي کې هغه اوږدمهاله شخړه چې نږدې ۸۰ کاله وړاندې رامنځته شوې وه د خبرو اترو له لارې په سوله ییز ډول حل او فصل شوه.
د دغې رامنځته شوې شخړې په پايله کې د ګڼو مالي تاوانونه ترڅنګ شپږ تنه وژل شوي وو او يو تن پکې ټپي شوی هم و، چې د مسؤلينو د پرله پسې هڅو او ناستو په نتيجه کې دواړو خواوو سوله ييز ژوند غوره کړ او له دښمني لاس په سر شول.
په ورته مهال د کنړ ولايت د سرحدونو، قومونو او قبايلو چارو رياست مسؤلينو د ديني عالمانو او قومي مشرانو په منځګړيتوب د ياد ولايت په شلتن ولسوالي کې د دوو دښمنو کورنيو ترمنځ سوله وکړه. د سولې د حل په مراسمو کې ګډونوالو د ښکېلو اړخونو تر منځ د دښمني پای یو لوی کار وباله او د اسلامي امارت د مشرانو د هڅو قدرداني يې وکړه.
د يادې رامنځته شوې شخړې په پايله کې يو کس وژل شوی، څو تنه ټپيان شوي وو او د ګڼو مالي زيانونو ترڅنګ يې ژورې ستونزې هم را ولاړې کړې وې.
