د ننګرهار مېشتو کوچیانو مشرانو سره کتنه
13/13/1443
د ننګرهار ولایت د سرحدونو، قومونو او قبایلو چارو رئیس ښاغلی قاري رحمت الله (غازي عمر) نن له غرمې مخکې پخپل کاري دفتر کې د کوچي ولس د بېلا بېلو قومونو مشرانو سره وکتل. په پیل کې ښاغلي حاجي ملک ګلمیران (دولتزي)، محمد هاشم (دانشیار) ، حاجي صاحب مروت خان او حاجي صاحب ظاهر خان د ناستي د ګډونوالو په استازیتوب خبرې وکړې. نوموړو د سرحدونو، قومونو او قبایلو چارو له وزارت سره د کوچیانو د عمومي ریاست په یو ځای کولو خوښي څرګنده کړه او ډاډ یې ورکړ چې موږ به د ننګرهار ولایت د سرحدونو، قومونو او قبایلو چارو ریاست تر څنګ ولاړ یوو او له دې ریاست سره هر ډول همکارۍ ته چمتو یوو.
همدا رنګه یادو مشرانو د سرحدونو، قومونو او قبایلو چارو د ریاست څخه د کوچیانو یو شمېر ملکانو ته د نويو کارټونو د ورکړې تر څنګ د روغتیایي کلنیکونو د جوړولو، د کوچیانو اولادونو ته د زده کړو زمینه د برابرولو، بیوزله کورنیو سره د مرستې کولو او د ننګرهار ولایت له والي د یو شمېر قومي مشرانو او دیني علمانو د لیدني غوښتنه وکړه. دننګرهار ولایت سرحدونو،قومونو او قبایلو چارو رئیس ښاغلي قاري رحمت الله ( غازي عمر) د ښه راغلاست ویلو تر څنګ د ننګرهار او د ختیځو سیمو قبایلو لپاره د پښتونستان د لیسې او د کوچي ولس لپاره د عبدالقادر کوچي عالي لیسې یادونه وکړه چي بالفعل پکې د کوچيانو او نورو قومونو بچيان پکې په زده کړو بوخت دي. ښاغلی عمر د سرحدونو، قومونو او قبایلو چارو ریاست د ننګرهار د ټولو قومونو ګډ کور وباله او د هر ډول ستونزو په حل کې یې ژمنه وکړه.
