د ملکي کارکوونکو د قانون په اړه د ښوونیز ورکشاپ جوړېدل!
تر یاد سرلیک لاندې ورکشاپ د ۱۳۹۹ لمریز کال د لړم میاشتې پر۱۸ مه نېټه د بشري زېرمو ریاست په نوښت جوړ شوی و.
په دې ورکشاپ کې د سرحدونو او قبایلو چارو سرپرست او نوماند وزیر ښاغلي محب الله صمیم، د جرګو او قبایلو چارو د همغږۍ معین ښاغلي محمد یعقوب احمدزي، رئیسانو، آمرینو او یو شمېر کارکوونکو برخه اخیستې وه.
په پیل کې د بشري زېرمو رئيس ښاغلي محمد یاسین پکتین د ورکشاپ ګډون والو ته د ورکشاپ د جوړېدو او ارزښت په اړه معلومات وړاندې کړل، له کارکوونکو څخه یې مننه وکړه، چې د ظرفیت لوړونې په ورکشاپونو کې ګډون کوي.
ورپسې د سرحدونو او قبایلو چارو سرپرست او نوماند وزیر ښاغلي محب الله صمیم خبرې وکړې وې ویل: خوښ یم، چې نن د ظرفیت لوړونې په داسې مهم ورکشاپ کې برخه اخلم، چې ستاسو درنو کارکوونکو د تجربو او وړتیاوو د زیاتوالي لامل ګرځي هیله مو دا ده، چې له دې فرصت څخه ګټه واخلئ او په دغه شان ورکشاپونو، سیمینارونو، ښوونیزو پروګرامونو کې ګډون وکړئ، ترڅو معلومات ترلاسه کړئ، کاري وړتیاوې مو پورته یوسئ او هم یې له خپلو همکارانو سره شریکې کړې.
همدا راز ښاغلي محب الله صمیم زیاته کړه، د اداري چارو په برخه کې د ملکي کارکوونکو قانون باندې پوهېدل اړین دي او تاسو کولای شئ، چې له دې سره خپله اداري پوهه غښتلې او خپلو هېوادوالو ته ښه خدمت وکړئ.
د یادولو وړ ده، چې یاد ورکشاپ به څلور ورځې دوام وکړي.
