د مالي او اداري لوی ریاست سرپرست د وزارت کارکوونکو ته وروپېژندل شو!
۱۸/۱۱/۱۳۹۹د سرحدونو اوقبایلو چارو وزیر ښاغلي محب الله صمیم له خوا د مالي او اداري لوی ریاست سرپرست ښاغلی حمیدالله بارکزی په داسې حال کې، چې د وزارت معینان، سلاکاران، رئيسان او د بېلابېلو ادارو څخه یو شمېر مېلمانه هم حاضر وو، د وزارت کارکوونکو ته ورپېژندل شو.
په هغه غونډه کې، چې له همدې امله جوړه شوې وه، لومړی د بشري زېرمو رئيس ښاغلي محمد یاسین پکتین له خوا د جمهور رئیس هغه حکم، چې د مالي او اداري ریاست سرپرست په توګه د ښاغلي حمیدالله بارکزي د ټاکل کېدو په مناسبت صادر شوی و، ولوستل شو.
ورپسې د سرحدونو او قبایلو چارو وزیر ښاغلي بارکزي ته د نوې دندې مبارکۍ ویلو ترڅنګ یې نوموړي ته په چارو کې د بریا هیله وکړه د یاد ریاست د چارو په سمون یې ټینګار وکړ.
ښاغلي محب الله صمیم زیاته کړه: هېواد مو په حساسو شېبو کې دی له بلې خوا د نړیوالې ټولنې مرستې مشروطې دي نو له اړوندو رئيسانو او په تېره د مالي او اداري لوی ریاست له سرپرست څخه مې هیله داده، چې د خپلو چارو د پرمخ بیولو ترڅنګ له اداري فساد سره د مبارزې په برخه کې جدي ګامونه پورته کړي.
وروسته ښاغلي حمیدالله بارکزي د افغانستان د اسلامي جمهوري دولت او د وزارت د مشرتابه له باور او اعتماد څخه مننه وکړه، چې نوموړي ته یې دا ستر مسؤلیت وروسپاره او ټینګار یې وکړ، چې خپلې چارې به په ژمنتیا او صداقت له نورو ریاستونو سره په همغږۍ او همکارۍ پرمخ یوسي.
