د غزني په ناور ولسوالۍ کې یوه ۱۶ کلنه شخړه په دوستي بدله شوه
سه شنبه/۲۳/۲/۱۴۴۶
د غزني ولایت په جاغوري ولسوالي کې د ځایي خلکو او د کوچیانو د خروټي قوم ترمنځ ۱۶ کاله مخکې د ناور ولسوالي په بای بوغه سیمه کې د یوه تن د تښتولو له کبله رامنځته شوې دوښمني د یاد ولایت د سرحدونو، قومونو او قبایلو چارو رئیس مولوي جان محمد حاجي مؤمن، محلي مسؤلینو، د شخړو د حل کمیسیون او قومي مشرانو په منځګړیتوب او هڅو په دوستۍ بدله شوه. د دې شخړې د حل په موخه په جوړه شوې جرګه کې د یاد ریاست رئیس ښاغلي حاجي مؤمن د عفوې او بښنې په فضیلتونو خبرې وکړې ویې ویل چې د خلکو ترمنځ سوله نه یوازې دا چې د ټولنیز سمون سبب ګرځي بلکې د الله تعالی ﷻ د رحمت دروازې په خلکو را پرانیزي. نوموړي په شخړه کې ښکېلې خواوې اخوت او یوبل منلوته راوبللې او له مرکچي پلاوي یې وغوښتل چې د دوی ترمنځ دي په عدل سره پرېکړه وکړي. د جرګې پرمهال دواړو لوریو منځګړي پلاوي ته اختیارلیکونه ورکړل، قومي مشرانو، چارواکو او د شخړو د حل کمیسیون استازو د دوی ترمنځ د خیر فیصله وکړه او له دې وروسته به یو بل ته هیڅ ډول خنډ نه جوړوي. دواړو لوریو د مرکچیانو فیصله په خوښي سره ومنله، ژمنه یې وکړه چې نور به یو له بل سره هیڅ ډول اختلاف نه کوي او د وروڼو په څېر به سره ژوند کوي.
