د شهید عثمان کاکړ پاک روح ته د مغفرت دعا وشوه!
د سرحدونو او قبایلو چارو وزیر ښاغلي محب الله صمیم نن له غرمې مخکې د پیاوړي ملتپاله مبارز او نوموتي سیاستوال ارواښاد عثمان کاکړ له زوی ښاغلي خوشال کاکړ سره ټیلفوني خبرې وکړې او هغه ته یې د خپل ژور خپګان مراتب څرګند کړل.
ښاغلي صمیم ارواښاد کاکړ د لر او بر افغانانو د حقوقو پياوړی مدافع وباله، چې همیشه یې د ظلم پر خلاف خپل آواز پورته کاوه، ترڅو پښتانه په خپله خاوره کې آرامه او هوسا ژوند ولري او له خپلو حقه حقوقو څخه یې څوک محروم نه کړي.
د سرحدونو او قبایلو چارو وزیر د خپلو خبرو په دوام د ارواښاد عثمان خان کاکړ پاک روح ته دعا وکړه او د خپل ژور خپګان مراتبو څرګندولو په ترڅ کې یې وویل: چې هڅه به وکړم د دغه ویاړلي شخصیت د جنازې په مراسمو کې برخه واخلم.
په مقابل کې ښاغلي خوشال کاکړ د افغانستان د اسلامي جمهوري دولت د سرحدونو او قبایلو چارو وزیر ښاغلي محب الله صمیم له نیک احساس، خواخوږۍ او همدردۍ څخه مننه وکړه.
