د سيمه ايزو ارګانونو د خپلواکې ادارې له نوی ټاکل شوي رئيس سره لیدنه!
د سرحدونو او قبايلو چارو وزير محترم محمد شفيق ګل آغا شېرزي نن د سيمه ايزو ارګانونو د خپلواکې ادارې له مشر ښاغلي شميم خان کټوازي سره وکتل او د محلي ادارو د پياوړتيا او پراختيا په برخو کې يې ورسره د قومي مشرانو د رول او اغېزمنتيا په اړه بحث او خبرې وکړې.
په دې کتنه کې ښاغلي شېرزي نوي ټاکل شوي رئيس ته د مبارکۍ څرګندولو ترڅنګ هغه د هېواد تکړه کدر او ژمن شخصيت وباله او د وياړ پګړۍ يې ورپه سر کړه.
په مقابل کې ښاغلي کټوازي له محترم شېرزي څخه مننه وکړه او د محلي ادارو په پياوړتيا کې يې د قومي مشرانو او مخورو رول اړين او ارزښتمن وباله .
